إكتم عن الناس ثلاث ذهابك،وذهبك،ومذهبك

الثلاثاء 12 مايو 2020 03:15 ص خالد البيومى

عاوز تستريح؟.
إعمل بنصيحة الإمام بن الجوزي: إكتم عن الناس ذهبك، وذهابك، ومذهبك.
أما ذهبك: حالتك المادية ودخلك متحكيش عنهم.. علشان لو معاك متتحسدش ويتطمع فيك، ولو مش معاك محدش يعاملك بشفقه ويستقل بيك، ومش شرط ذهبك يكون فلوس.. ممكن يكون صديق بيفهمك، حبيب بتحس معاه بالارتياح، وكل صاحب نعمه بيتحسد فداري علي نعم ربنا عليك بحيث يدوم وجودها وتفضل تحس بقيمتها وفرحتك بيها.
أما ذهابك: بمعني إن لو جايلك عريس متقوليش!.. رايح تخطب متسيحش، داخل علي شغل جديد متحكيش، ربنا سهلك في أي خطوه متفضحش الدنيا وإسكت!.. إمسك لسانك وهتلاقي خططك بتتحقق كأنها بتجري!.. لأن العين فلقت الحجر، وياما ناس لما بنحكيلها بنندم لأن كلامهم بيحبط ويخلوك تحس إنك إنتهيت قبل حتي ماتبدأ.. فخليك ماشي بالستر لأنها مش ناقصه فضايح.
وأما مذهبك: يعني ميولك وأفكارك.. بتحب إيه وبتكره إيه.. عشان متدخلش في جدالات فارغة وتوجع قلبك بحوارات ملهاش اي لزوم.. إسمع مني، ولو عاوز ترتاح متنصحش اللي مطلبش نصيحتك، ومتقولش اسرارك لأن بمجرد ماتحكي هتبقي كارت واتحرق ومحدش هيبقي عنده فضول يعرفك عشان الفضفضة ليها شهوة سواء للي بيتكلم أو للي بيسمع.. بس أول ماتخلص فضفضة بتنتهي شهوة غيرك منك فبيمل.. خليك باب مقفول وساعتها هتفضل محافظ علي زهوتك ولمعانك في نظر اللي حواليك.
يقول سيدنا عمر بن الخطاب: ندمت علي الكلام مرات، وما ندمت علي الصمت مرة!.
منقول وأعجبنى