الطبع غلاب

الثلاثاء 28 سبتمبر 2021 11:46 م

الطبع غلاب…..

بقلم د.نجلاء البيومى
هو صحيح الطبع غلاب؟….معرفش انا
طيب هو صحيح مافيش حد بيتغير ؟…بحاول الاقي اجابة
طيب هو الزمن مش بيغير فينا حاجات كتير ممكن يكون منها طباعنا…….
الحقيقة لأ الزمن ممكن يخلينا نحس اننا ممكن نتغير او نغير اي حد لكن التجارب والمواقف اللي بنعيشها بتاكد دايما ان الانسان بيتولد وهو عنده خريطة جينية واعتقد والعلم عند الله ان جينات الطباع بتكون جينات جامدة جدأ مبتتغيرش يعني العصبي مهما يحاول يقنع نفسه انه اتغير وبقي هادي بيكتشف مع اول موقف ان ده محصلش وانه لسه عصبي وعلي كده كل الصفات الكرم والبخل والوفاء والخيانة والاصل وقلة الاصل ……وغيره وغيره واللي ممكن يخليني اصدق الكلام ده ان كتير مننا بيتعرض لمواقف سخيفة ويفتكر انه اتعلم ومش حيكرر الخطأ ده تاني وسبحان الله بيعيش نفس السيناريو مرة تانيه وممكن يكون بنفس التفاصيل لدرجة انه بيستغرب نفسه وبيردد عبارة رياض القصبجي الشهيرة مع اسماعيل يس "هو بغباوته" علشان كده اوعي تفتكر انك حتقدر تغير حد اذا اخترت صداقة انسان او معرفته او الارتباط بيه فكر انك حتتعامل مع الشخص ده بطباعه دي اذا قبلتها كمل واوعي تقول بينك وبين نفسك او لأي حد بكرة حيتغير لان المؤكد ان ….الطبع غلاب