سيدة الرولزرويس

حدوتة 
                             سيدة الرولزرويس 
الاسكندرية ١٩٣٥
عبد الموجود افندى و زوجته أمينة المعداوى قررو  الخروج للتنزه ساعة العصارى فى حديقة البلدية  و التمتع بالأشجار و شلالات المياه و طيور البجع وهى تسبح فى البحيرة 
الله على الجمال ياعبد الموجود  الواحد عينه بتستريح  لما بيتمشى وسط الخضرة  ويشم الهواء 
اجيبلك درة مشوى يا أمينة 
زى ما تحب يا سى  عبد  الموجود مش عايزة اتقل عليك 
تتقلى  ايه يامينة  انتى  لو طلبت اجيبلك الدنيا حجبهالك ده انتى ست الناس 
وفى انتظار كوز الدرة يتشوى  تمر سيارة فاخرة يقودها سائق يرتدى  يونيفورم  ازرق  وتجلس فى الخلف شابة رائعة الجمال تبتسم لأمينة ابتسامة مودة 
ياسى  عبد الموجود مين الهانم إللى راكبة الاتومبيل الكبير ده 
دى مدام فيينى   جوزا فيينى  مرات اوزوالد فيينى  رئيس الجالية الإنجليزية و تاجر كبير قوى
وانت عرفت  ازاى ياسى عبده 
اصل انا بحب الاتومبيلات جدا  وعارف كل اتومبيلات أسكندرية  وخصوصا الفريدة منها و الاتومبيل ده رولزرويس  اغلى تومبيل  فى العالم عارف إللى عندهم فى اسكندرية
 واحد واحد  زى مدام سالفاجو 
بس العربية دى بتاعة مدام  فيينى 
ودول أغنية جامد كده ياسى عبد الموجود 
أغنية قوى يا أمينة  تيجى اوريكى  القصر بتاعهم  وكمان المكاتب بتاعة الشركات بتاعتهم 
بعيد يا سى عبد الموجود لا قريب حنتمشى فى شارع المانيا ونوصل  لحد شارع رولو 
شارع المانيا مش هما غيرو اسمه بقى شارع السلطان حسين كامل 
ايوة معلش لسه لسانى  واخد على الاسم القديم 
شفتى يا أمينة ده المبنى بتاع الشركات بتاعهم  
و المبنى ده القصر بتاعهم 
قصر ايه ياسى عبد المجيد دى عمارة كبيرة وفخمة 
لا ماهو اشتراها  وجاب مهندسين  نشرو  الجدران الداخلية  وعملوها  قصر  وكمان شايفة الميناء الشرقى  وجناين  المستشفى الميرى  عارفة الدور الأول فيه حمام سباحة و صالة ألعاب  والدور الرابع فيه مسرح و مكتبة اما الروف 
يعنى ايه روف ياسى عبده 
السطح يعنى يا امينة  كله تماثيل زى انطونيادس  وقاعدات  وجنينة شايفة البحر و بحيرة مريوط وفيها اساتسريين زى بتوع عمر افندى وكلها رخام 
طب المدام دى شكلها صغير قوى  هو مسيو فيينى ده شاب 
لا بالعكس  مسيو فيينى ده كبير فى السن أكبر منها ب ٢٥ سنة 
هو فى مرة كان فى ايطاليا سنة ١٩٢٤  وشافها هناك،كانت فتاة  عادية  عندها ١٦ سنة  وهو كان عنده ٤٥ سنة  جابها واتجوزها و علمها  الاتيكيت و كل حاجة فى ٣ سنين  وبقت سيدة مجتمع ده فيه ناس بتقول انه جابها من ملجاء فى مدينة ايطالية اسمها تريستا 
ملجاء يانهارى ويتجوز  واحدة من ملجاء 
لا ماهو دى اشعات محدش،يعرف الحقيقة 
بس الخواجات ليهم فكر تانى 
عارفة يا امينة  دول كل يوم يعملو حفلة شكل فى السراية بتاعتهم،ويعزمو  الأمراء و البشاوات و أشهر ناس ة أشهر فناننين وكمان بيعملو  مسابقات  تنس فى نادى سبورتنج 
وفلوسهم  متبتخلصش  ياسى عبد الموجود 
تخلص ايه يا امينة  دول بيتاجرو  فى الدهب 
صايغ  يعنى  ياسى عبد الموجود 
لا الذهب الأبيض يا أمينة القطن ياعنى ماهو ده الذهب بتاع مصر  وكمان عنده دار نشر اسمها الشركة  الشرقية للنشر  بتطبع  أشهر جرايد أجنبية فى مصر   الايجيبشن جازيت  و الايجيبشن ميل و  بورص دى ايجيبسيان و لوبرورجريه ايجيبسيان 
وكمان محتكر  الخميرة فى مصر  وبيصنع حاحة اسمها الاكسجين  الاثيلينى و عنده شركة لإنتاج القماش اسمها شركة المغازل المحلية و شركة لتجارة القطن اسمها شركة الاسكندرية التجارية وكمان  ملك صناعة الالبان  وكمان بيبنى  عقارات 
وعندهم  كام عيل دول يا سى عبد  الموجود 
لا ماعندهومش عيال يا امينة  بس اتبنوا  ولد وبنت عايشين  فى السراية بتاعتهم  فى جليمونوبلو 
والله دى حدوتة حلوة قوى ياسى عبده  
ياله نروح بقى كرموز تنادينا 
طبعا شارع رولو  بقى اسمه شارع الدكتور احمد عبد السلام المعروف بشارع كلية الطب اما العمارات ٣  فهم 
١ شارع  الدكتور احمد عبد السلام   الشركة على الطراز الفلورنسى  الإسلامى 
٣ شارع  الدكتور احمد عبد السلام  قصر فيينى 
٥ شارع الدكتور  احمد عبد السلام  
وليهم املاك كتير تانية فى اسكندرية 
الصور  ل  ١  و٣ وه  شارع احمد عبدالسلام    رولو  سابقا 
أو كما نعرفه شارع كلية طب او شارع المستشفى الميرى  
المكان امام بوابة المستشفى الميرى