الأخبار العاجلة
- الجمعة, 10 مايو 2024
-
رئيس مجلس الإدارة و التحرير
خالد حسين البيومى
بودعك 💔
بودعك .. قبل الوداع بسنين
يامليحة القول والفعال ..
يا طاهرة الشفتين
بمسك في ديل جلبيتك .. وأبكي
رجليا رجل في جنتك ..
ورجل في شكي
بمسك في ديل جلبيتك وأنوح
بحب لكن .. لا فؤاد ولا روح
لما اليتيم يعانق المجروح ..
يقع القمر نصين
يا وادعه .. يا طاهرة الشفتين
قطر الصباح قبل الصباح .. جاني
ولما جاني الصبح قطر الصباح ..
كان صوته عداني
كان صوته أبعد صورة في وداني
قعدت اشرب ع الرصيف وانعي
تدوس رجول الناس علي دمعي
وطعم شفتيك مرار اليتم
ومن بعيد كانت بيوت الناس متكومه
تحت النخيل والصبر
وانا ع الرصيف الصخر وحداني
بدارى بأيدي عورتي وانعي
وتدوس رجول الناس علي دمعي
وما المهوش بايدى
جوة الطعام طعمين ..
جوه الشراب شرابين
دلوقتي بوستك بوسه ولا اتنين
دلوقتي انتي واحده ولا اتنين
كل الحاجات دلوقتي لها طعمين
وفي كل شيء شئ ..
كل شيء اتنين
#الخال
#عبدالرحمن_الأبنودي
فى ذكرى وفاته .
إعداد .أشرف رزق البيومى
اترك تعليقك