نداءات لإعادة تشغيل القرية الكونية بحدائق أكتوبر

كتب /عصام نور البيومى♦️نداء عاجل لرئيس مجلس الوزراء
نريد اعاده تشغيل القريه الكونيه المعرض العظيم لخريطه مصر السياحيه♦️هذا المكان العظيم
الموجود فى هذه الصور
اسمه القرية الكونية (little egypt)
مكان ثقافى تعليمى سياحى فى مدينة حدائق اكتوبر بالجيزة وهذا كان المفروض تابع لوزارة التربية والتعليم 
المكان دا كان يرتقى للعالمية عبارة عن معالم مصر السياحية بشكل مصغر بما فيها معالم اثرية وشواطئ وانشطة ورياضات وقبة سماوية واضخم خريطة مجسمة للعالم فى الشرق الاوسط وكافتيريات ومسطحات خضراء وحاجات كثيرة في جمالها وضخامتها. لتفها فى مده 6 ساعات لو تحب تزور كل المزارات ال فيها (كان فيها مجسم لكهف الجارة ووادى الحيتان والصحرا البيضا والبحر الاحمر وسلسلة جبال البحر الاحمر  وشرم والنيل والدلتا دا غير القلعة والاهرامات والسد العالى وسقارة ومعابد الاقصر وابو سمبل وقلعة قايتباى وبرج القاهرة ) كل دا كنت بتزوره فى مكان واحد مع شرح للاماكن وبتدخل تحضر فيلم فى القبة السماوية  وبعد كدا تعمل رحلة نيلية كبيرة فى مركب سياحى وبتقف ادام كل مزار بالمركب ويتشرح وبعدها بتنزل من المركب تعمل الزيارة وبعد كدا تطلع على طفطف يعمل بيك زيارات الاقصر واسوان وتدخل جوا المعابد وطريق الكباش وبعدين تخلص تروح تعمل سفارى بعربية سباق فى الصحراء الغربية واخر حاجة بلاج وكافتيريات على شاطئ جميل للبحر الاحمر تقعد وتستجم على البلاج شيزلونجات وشماسى وبدال فى البحر. وكان هناك فى مجسم لبرج القاهرة تطلع فوق تتفرج على شكل مصر كلها من فوق والمزارات وكان فى كمان فوق البرج مطعم زى المطعم الدوار ال فى البرج بالضبط . 
كل هذا كان سنة 2014 و 2015 واتفتحت للناس بشكل تجريبى كان وقتها تكت دخول كل الحاجات دى بالالعاب بالانشطة بالشرح وقضاء اليوم كله ب 50 ج للفرد وكانت ممتعة جدااا وناجحة جدا. لحد ما حصلت كارثة فى مرة عام 2015 مهندس وزوجته واولاده راحو يزورو القرية وحصل ان فى طفل من الاولاد وقع على شاطئ مجسم نهر النيل ودا كان عميق جدا حوالى 8 متر تقريبا وطبعا والده المهندس نزل ورا ابنه ينقذه من الغرق وللاسف مكنش بيعرف يعوم فانقذ الولد وللاسف المهندس غرق وتوفاه الله ربنا يرحمه يارب ويصبر اهله. من بعدها تم اصدار قرار باغلاق القرية نهائيا وعدم السماح بالزيارة الى يومنا هذا !!! 

طبعا رحمة الله على المهندس ال اتوفى وممكن نتفادى دا مستقبلا  بان يتم  اتخاذ كل الاجراءات اللازمة لتأمين الزوار بعمل سور على طول النهر كانه كورنيش كدا وتوفير طاقم انقاذ فى كل مكان فى القرية ولكن للاسف الحل الاسهل ان القرية تتقفل وتصبح مهجورة الى الان . 

متخيلين مدى قرية بهذه الضخامة والامكانيات اللي فيها والعظمة دى بقت مجهورة بالشكل دا رغم انها ممكن تكون مصدر دخل ممتاز للسياحة دا غير طبعا استفادة الطلاب من كل المراحل التعليمية منها !! 

ياريت بعد مانعدى ازمة فيروس كورونا دا على خير ونبتدى نفوق من الظروف المحيطة تبتدى وزارة التربية والتعليم ووزارة السياحة ومجلس الوزراء بالنظر مرة اخرى لملف هذه القرية الكونية واعادة فتحها بعد تامينها واعداد عناصر السلامة والامان بها خصوصا انها مش هتكلف الدولة اى حاجة لانها بالفعل مبنية وبها كافة المعدات اللي محتاجاها يعنى جاهزة على التشغيل لانها مكملتش شهور من فتحها التجريبى وبعد كدا اتقفلت قبل الافتتاح الرسمى لها حتى..