قبل فوات الأوان

من 5 سنين , قابلت أحد أصدقائي و هو بيفتتح صيدليته الجديدة , و باركت له , و من فرط حماسه , قال لي إنه ناوي يخلي الصيدلية دي أكبر صيدلية في المنطقة .. و على مدار الـ 5 سنين اللي فاتوا , بقى بيطبّق في الصيدلية بالـ 3 و 4 ليالي , و فعلا قدر يحقق هدفه بجدارة .. و بقت صيدليته أكبر صيدلية في المدينة كلها , .. و من 4 شهور بس , قابلته تاني , و سألته عن الأخبار دلوقتي , لقيته قال لي جملة غريبة جدا : ..
- لما بقيت رقم 1 و طوّلت , مالقيتش فيه حاجة بتزغزغني ..
سألته عن معنى اللي قاله , فوضّح لي إنه في بدايته , كان عنده الرغبة إنه يبقى الأفضل , بس ما سألش نفسه عن الخطوة اللي بعد كده .. و ضحى بحاجات كتير غالية , عشان يحقق الهدف ده .. و لما وصل للهدف بدري , اكتشف إن اللي ضحى بيه من صحته و أسرته و وقته و أعصابه و أصحابه و دينه , كان أغلى بكتير من هدف مرتبط بالشغل , ..
.
بيقول لي : مالقيتش حد سقّف لي , ولا لقيت الناس كل يوم بتهنيني ع الإنجاز اللي باعمله .. و الأصعب إني مالقيتش هدف جديد من النوع ده , يستاهل إني أسعى له , بعد ما وزني زاد , و أسرتي اتدمرت .. أيوة بقى معايا فلوس .. لكن حتى دي , اكتشفت إنها ممكن تطير في 24 ساعة , لما عرفت إن أحد أفراد عيلتي , محتاج زرع كلى .. و بعد ما كنت مقتدر , بقيت مديون !! ..
.
مابقيتش عارف أقول له إيه .. 
و هو ماكانش مستني مني رد ..
بس حمدنا ربنا إنه فاق بدري ..
فيه ناس وصلت لنفس النتيجة دي و أسوأ ..
و لسه ما فاقتش !! ..
.
فيه أسلوب حياة , بدأ يتشهر على مدار السنة اللي فاتت , اسمه Slow living .. لو بحثت عنه , حتلاقيه بيشجعك على إنك تعيش حياتك "واحدة واحدة" .. على مهلك .. من غير صربعة ..
.
إحنا بقينا بنقوم من النوم , مضروبين على دماغنا .. و نفضل طول اليوم مضروبين على دماغنا , لحد ما نرجع ننام تاني من كتر التعب .. و ساعة ما نحط دماغنا ع المخدة , النوم يروح و الأرق يشتغل , من كتر التفكير !! ..
.
بقينا أسرى الـ FOMO أو الـ Fear of missing out !! ..
.
لازم ألحق كل فرصة قبل ما تضيع ..
لازم أكون على اطلاع على كل الأحداث ..
لازم أبقى على علم بكل حاجة جديدة ..
لازم أقرا كتب أكتر , و أذاكر أكتر ..
لازم أعرف أي تريند أول ما يبدأ ..
لازم أشتغل أكتر , عشان أنجح أكتر ..
لازم أعمل فلوس أكتر , عشان مابقاش فقير ..
لازم آخد قرض , عشان أجيب اللي نفسي فيه ..
لازم أكبر مشاريعي , قبل ما غيري يكبر مشاريعه ..
.
خناقات و صراعات و تهافت على كلام فاضي , و أهداف وهمية , و سراب كداب .. ".. كَسَرَابٍ بِقِيعَةٍۢ يَحْسَبُهُ ٱلظَّمْـَٔانُ مَآءً حَتَّىٰٓ إِذَا جَآءَهُۥ لَمْ يَجِدْهُ شَيْـًٔا وَوَجَدَ ٱللَّهَ عِندَهُۥ فَوَفَّىٰهُ حِسَابَهُ" ..
.
اللايف ستايل بتاع الـ Slow living ده , عاوز منك عكس كل ده .. اشتغل و انجح و اعمل فلوس و كل حاجة , .. بس و انت واخد بالك من بقية جوانب حياتك , .. زمايل كتير بيقولوا لي إنهم اتفاجئوا إن عيالهم كبروا من غير ما ياخدوا بالهم , و إنهم مالحقوش يستمتعوا بفترات الطفولة و اللعب اللي كانوا مشغولين عنهم فيها !! ..
.
أحد عمالقة البيزنس اسمه Dan Lok , بيقول إننا دايما بنسمع إن Time is Money , بس ده غير صحيح إطلاقا .. لإن الوقت أغلى من الفلوس بكتير .. و الدليل ببساطة : ..
الفلوس تقدر تعوضها ..
لكن الوقت ما يتعوضش ..
.
و انا باقول لك :
شيل كلمة "الفلوس" و حط مكانها أي حاجة تقدر تستغنى عنها جزئيا : الشهرة .. الكارير .. النفوذ .. المكانة الاجتماعية .. الوجاهة ..
كل دول ممكن يتعوضوا !! ..
و حط مكان "الوقت" كل اللي صعب يرجع بعد ما راح : ..
صحتك .. عيلتك .. ذكرياتك .. 
الخواجات بيقولوها كده : Less is More ..
و في الحديث الشريف : ما قل و كفى , خير مما كثر و ألهى ..
خد نفسك ..
شيل رجلك شوية من ع البنزين ..
افتح إزاز العربية , و بص ع الطريق من الجنبين ..
استمتع باللي حتشوفه على رواقة , ..
لو وصلت متأخر شوية و مبسوط , ..
أحسن من لو وصلت بدري ساعة ولا حتى ساعتين , و عندك كوكتيل أمراض مزمنة , والعياذ بالله !! ..