لماذا تتمنى أثيوبيا ضرب مصر لسد النهضة

ما رأي حضرتك في هذا الكلام؟

لماذا تتمنى إثيوبيا ضرب مصر لسد النهضة؟

من أول المبادئ إلي اتعلمتها في دراسة العلوم السياسية إن إلي بتشوفه على مشهد المفاوضات مش بيبقى هو المطلوب في الأساس.. بيبقي في أهداف مخفيه بيتم المناورة بيها.. فالمفاوضات ببساطة هي لعبة زي الشطرنج بالظبط. 

طبعا انت إستغربت من العنوان لماذا تتمني إثيوبيا ضرب مصر لسد النهضة؟  لأن المفروض إن الضربة العسكرية متبقاش في صالح الدولة الاثيوبية بس خليني أسرد ليك بعض النقاط إلي بعدها هوضحلك الفكرة.. وهقولك معاها تحليلي. 

- سد النهضة كانت فكرته الأساسية إنه يكون سد صغير للحدود لكن تم تحويله لسد ضخم من مبدأ استغلال الفرصة للأزمة إلي حصلت في مصر في ٢٥ يناير فأصبح بسعة تخزينية وارتفاع أضعاف المتفق عليهم من البداية، وده تم في غياب الدراسات الفنية للتربة ومنطقة الإنشاء إلي فيها مخاطر كبيره على السد وده تأكيد لجان فنيه كتير ومن بينها الجانب المصري من 2012.

- تم أسناد الأعمال الكبرى في إنشاء سد النهضة إلى شركة "سالني كريستكفوري"، إلي ملوش خبرة كبيرة في الأعمال الإنشائية الضخمة في افريقيا، وخبرته بتقتصر على السدود الصغيرة بإثيوبيا... وده أدى لوجود مشكله في طوربينات السد وعدم قدرة المقاول الإيطالي على تركيبها وإلي فشلت تجربتها في ألمانيا الأسبوع إلي فات. 

- اللجنة الدولية الأولى لمعاينة سد النهضة والمكونة من خبراء من ألمانيا وفرنسا وجنوب أفريقيا، قدمت تقريرًا لإثيوبيا تضمن الإشارة إلى أخطاء فادحة في بنائه“. وتقرير الخبراء الدوليين ذكر نصًا أنّ ”السد جرى إنشاؤه بلا دراسات وأن التصميمات الإنشائية المقدمة عن السد لا ترقى بصورة نهائية ولا تضمن بقاء السد. 

-  رئيس الوزراء الإثيوبي آبي أحمد، اطلق تصريح نادر محصلش غير مره وآحده أفاد فيه أن مشروع سد النهضة يواجه تحديات تهدد استكماله، وقال نصا: ”لقد سلمنا سدًا مائيًا معقدًا لشعب لم ير سدًا في حياته، وإذا سرنا على المنوال الحالي، قد لا يرى المشروع النور“.

- مدير مشروع سد النهضة الإثيوبي،  عُثر عليه ميتا برصاصة في رأسه في سيارته في أديس أبابا يوم 26 يوليو ٢٠١٨، والانباء بتقول إنه انتحر نتيجة الأخطاء الجسيمة في بناء سد النهضة وإلي فضل متوقف لمدة سنتين بسببها.

- الوضع السياسي في إثيوبيا غير مستقر وهش وكل الأنظمة السياسية في إثيوبيا ضخمت مزايا سد النهضة الي هتعود علي الشعب في حال تنفيذه وده طبعا خلى الشعب في حالة أمل كبيره للمستقبل بسبب الرخاء إلي هيعود عليهم بسببه.. وده معناه استخدام السد كورقة سياسية في الداخل الاثيوبي. 

طيب افترض معايا إن كل النقاط إلي اشرت ليها باختصار صحيحه تخيل رد فعل الشعب الاثيوبي لما تتم مصارحته بإن السد ممكن ميتمش لأي سبب من الأسباب.. تخيل هيبقي رد الفعل إيه في الداخل الاثيوبي، فيبقى المخرج الوحيد هو استغلال السد سياسيا كأداة ضغط ومناوره سياسية. 

المحلل للخطاب الإعلامي الاثيوبي هيلاقي إنه مبقاش يتكلم عن المزايا إلي هتعود علي الشعب بعد إنشاء سد النهضة لكن أصبح يتكلم عن الحرب مع مصر وسعي مصر لافقار الجانب الاثيوبي والسيطرة على مقدراته. فبالتالي لو تم توقف السد نتيجة ضربه عسكرية مصرية هيبقي المخرج باختصار.. "أهي جت منهم".. وشوف المصريين عملوا في بلدنا إيه ودمروا مستقبلنا إزاي 

وتلويح الجانب الاثيوبي بالحرب واستعداده ليها - رغم الفارق النوعي في الامكانيات- واستخدام الرسائل الإعلامية الاستفزازيه للمصريين بتؤكد تخبط الجانب الاثيوبي لأن باختصار مصر لم تتحدث عن الحرب أو حتى تشير ليها تلميحا أو تصريحا ودايما بتتكلم عن الحلول السلمية والمفاوضات.. يبقى سيرة الحرب ظهرت منين... وبالتالي إثيوبيا تتمني ضرب مصر لسد النهضة 

المهم إلي عايز أقوله الدولة المصرية وقيادتها عارفة كويس بتعمل إيه وإلي خلاها تدير باحترافية أزمة الفوضي في مصر مع تدخل كل القوى المعادية لمصر في البلد وقتها وتعمل الانجازات وتقوي جيشها قادرة إنها تتعامل مع ملف سد النهضة.. لأن ببساطه عمرنا مهنعرف آكتر منهم.

بلاش ننساق ورى الكلام على شبكات التواصل الاجتماعي للترويج للحرب وشحن المواطنين وتشكيكهم في بلدهم الي كلنا عارفين من وراه وافتكر دايما الاجتماع الي تم بثه على الهواء مباشرة لبحث أزمة سد النهضة... وخلي بالك إن تكلفة الحرب مره وكل إلي بيدعوا ليها دلوقتي هما آكتر ناس هينتقدوها لما تتم... إحنا مشغوليين ببناء بلدنا للمستقبل ومش عايزين حرب تعطلنا. 

وافتكر دايما إن المفاوض المصري والقائد المصري عارف كويس أدوات اللعبة ودايما خليك فاكر إلي بتشوفه في مشهد المفاوضات مش بيبقي هو الهدف الأساسي في النهاية 😉

#سدالنهضة